Homily of the Basilica Rector during the Fiesta Señor 2025 Opening Salvo Mass 

January 9, 2025 | Basilica Minore del Santo Niño de Cebu

Viva Senyor Santo Niño!

‘Pit Senyor!

Maayong buntag kaninyo mga igsoon!

Nagkatigum kita ning sayo sa kabuntagon isip usa kapanon aron buksan ang kasaulogan sa fiesta ni Senyor Santo Niño sa Sugbo!

Matag usa kanato adunay mga katuyo-an, apan angay natong hinumdoman nga una sa tanan ang Ginoo nga buhi nga pinaagi sa imahen sa Batang Jesus, ang nag tawag kanato aron kita magkapundok isip iyang katawhan diin kita mopanaw padulong sa atong gilauman. Gitawag kita sa Dios dili tungod kay kita mga balaan ug matarung, apan tungod kay kita mga masalaypon ug nagkinahanglan sa iyang Diosnong kaluoy ug panabang!

Niining dapita ug karong mga taknaa, monunot kita sa panaw sa katawhan sa Dios kay mao man kini ang hinungdan nganong mosaulog kita’g tinuig nga fiesta: pagpaminaw sa pulong sa Ginoo, pagdawat ug pagpasalamat sa iyang mga grasya, ug paghinundom sa atong kasaysayan kanus-a kita nahimong mga Kristiyano nga gitawag aron ang kinabuhi mabag-o!

Mag fiesta kita dili tungod kay magbuotbuot kita’g himo og Ginoo nga moangay sa atong tinguha ug kagustohan! O basin kaha, atong pagahimuong magikero si Santo Niño nga mosunod sa atong mga kapricho! O basin mura kita’g mga torista, mohapit lang sa basilica manguros ug magwarawara sa Balaan Bata bisan ang atong mga sapot, halos makita na ang mga kunot sa atong sampot! Matud pa sa uban, mosabot ra si Santo Niño oi! kay ang mga Frayleng Agustino ra man ang strikto pa sa Ginoo (matud pa sa mga komentaryo!). Sa tinuod, ubay2 ang nangutana nganong gipatuman ang dress code pagsulod sa dapit sa Basilica?

Mga igsoon tugoti ko nga sa maong pangutana manukad ang akong pamaladong ug mensahe niining unang adlaw sa atong nobena! Ug karon ako mokanta:

ANG SIMBAHAN GIPATINDOG

NIADTONG MGA TAWHANA

ARON ANG LARAWAN NIMO DUNAY USANG PULOYANAN

UG DIDTO GIHANGYO NILA

NGA KALOYAN NIMO SILA!

Matud sa kanta, may duha kakatuyoan nganong gipatindog ang simbahan nga karon gitawag og Basilica: 1. Aron ang larawan ni Santo Niño dunay puloy-anan; 2. Aron adunay dapit diin sila kaloy-an!

Karon atong palawman ug hinuklogan ang upat kapulong nga mosunod: mga Tawhana, Larawan, Puloyanan, Kaloy-an Sila!

1. MGA TAWHANA (sila daghan ug wala mag-inusara hulagway sa kapunongan o simbahan, ang katawhan sa Dios o Church)! Ang atong mga katigulangan nahimong mga katawhan sa Dios pinaagi sa bunyag diin ang imahen sa Batang Balaan nahimong gasa ug timaan sa ilang pagka binunyagan. Sila ang katawhan (ang simbahan) nakabig ug mipanaw (pilgrims) paduol sa Batang Balaan kay siya ang ilang dalangpanan. Mao kini ang tinubdan sa tinui’g natong kasaulogan, ang kasaysayan sa pagkasakup sa atong mga katigulangan sa simbahan, ang lawas ni Cristo ang kaluwasan sa katawhan!
2. LARAWAN (Image)! Ang imahen ni Santo Niño giila sa simbahang Katoliko nga hulagway sa Batang JesuCristo. Matag sud-ong nato sa imahen, mahinumdom kita sa atong Dios nga dili makita kay si Jesus man ang nag paila kanato sa Dios aron siya makita! Matud pa ni San Pablo “He is the image of the invisible God (Colossians 1:15).” Busa, angay lang gayud natong ipadayun ang pahupot sa imahen nga giila sa atong simbahan ug dili kadtong nagdala’g bulsa ug kwarta. Si Santo Niño, ang pulong nga nagpakatawo wala mag dala’g suwerte kondili panalangin ug kaluoy sa mga kalag nga sa kalibutan nag antos ug gikapoy.
3. PULOY-ANAN (Dwelling)! Ang puloy-anan dili sama sa mga palasyo, kapitolyo, City Hall, Barangay Hall o shopping mall; Ang Basilica giisip nga templo sa Ginoo: BALAAN ug MATAHUM nga sama sa giingon sa Salmo 84: How lovely is your dwelling place o Lord (palihug lang ko’g basa unya inig uli ninyo!). Matahum gayud ang puloy-anan o templo sa Ginoong atong Dios nga tungod sa sala ikaulaw natong mopaduol ug moatubang kaniya tungod kay kita mga hubo! Ang sala maoy naghukas sa atong dignidad isip mga anak sa Diyos! Ang sala maoy nakahimo kanatong PWSD, Person with Spiritual Disability (o Dysfunction)!
4. KALOY-AN SILA (Mercy)! Apan ang Ginoo unang naluoy sa mga tawo sa ilang pagka PWSD busa iya silang gisul-oban sa kaluoy ug pasaylo, nga pinaagi sa iyang pulong nga nagpakatawo (si JesuCristo!) nga ang motuo ug mosunod kaniya mapasaylo ug makabaton sa paglaum ang saad sa kinabuhing dayun. Ang kaluoy sa atang Ginoo ang gipangayo sa atong mga katigulangan dinhi ning dapita, ug unta karon mao pud ang atong gisangpit ni Senyor Santo Niño!

Mga igsoon mao gayud kini ang mga punto sulod sa tema sa atong fiesta: Santo Niño: Paglaum sa nag Panaw nga Simbahan! Santo Niño: Hope of the Pilgrim Church.

Tinuod gayud nga siya ang bugtong paglaum sa katawhan ug dili ang mga butang nga atong gitinguhaang suwerte nga si Santo Niño pangayo-an, dili gani ang mga kaparian sa inyong atubangan, labaw nang dili ang mga tawo nga ang mga nagngisi hulagway karon gisang-at na sa atong mga agianan ug kadalanan! Ang mga butang nga maanindot ug usahay hugot ang atong pagkupot, molabay ug dunay kinutuban! Ang mga pulong sa tawo, tam-is paminawon apan inig labay sa panahon, murag panganud nga mahanaw human mapalid sa huyop sa babang bakakon! Busa dili kita angay mosalig sa mga butang, sa atong kaugalingon kakayahan, ug sa ubang matam-is ang dila, kung kini sila wala tugpahi sa Diyosnong panalangin!

Ang Ginoo ra gayud ang atong paglaum, kay ang iyang saad ug pulong dili gayud niya pakyason!  Misaad siya’g kaluwasan sa napukan nga katawhan ug tungod sa iyang gugma sa kalibutan “…gihatag niya ang iyang bugtong anak aron ang tanan nga motuo kaniya dili mamatay, kondili makabaton hinuon sa kinabuhing dayun! (John 3:16)” Dili kini bakak, natuman kini sa atong kasaysayan, gani mao man kini ang hinungdan sa atong pagkahi-usa karong buntaga aron subli siyang pasalamatan!

Si Santo Niño ang imahen sa dakung gugma atong Dios, nga miabot sa Sugbo aron pagpaila sa mga daang tawo diin sila nakabig sa pagtuong Katoliko, nagpatindog sa simbahan isip puloy-anan sa Dios nga dili makit-an, ug kon adunay mga higayon sila mopanaw aron pagduaw ug didto gihanyo nila nga kaloy-an nimo sila!

Pit Senyor! Viva Senyor Santo Niño!